JCC MEETING VAWI 2-NA CHIEF SECRETARY, L.TOCHHONG HOVA NEIH A NI
        Japan sawrkar senso a development study neih mek, 'Study on Development and Management of Land and Water Resources for Sustainable Agriculture in Mizoram' atan a din, Joint Coordination Committee (JICA) chu a vawi hnihna atan Dt. 25th June 2014 chawhnu dar 1:00 khan Chief Secretary, Pi L.Tochhong, hovin an thu khawm. He development Study, 'Study on Development and Management of Land and Water Resources for Sustainable Agriculture in Mizoram' tih hi nikum September atanga bul lo tan tawh a niin, tuna thlen chin leh hmachhawp mekte Mr.S Yamaoka, Team Leader, JICA Study Team-in a powerpoint hmangin a sawifiah.
        He Development Study hi April 2015 thleng awh tura duan a niin, a tum ber chu, Mizoramin ei leh bara hmasawnna a neih theih nana 'Master Plan' duan chhuah te, Minor Irrigation project changtlung zawk leh tha zawk neih theihna tura 'Model DPR' siamte leh, Minor Irrigation Department a thawkte leh agriculture kaihhnawih department dang zawng zawnga thawkte thiamna sang zawk neihtir a ni. He study ah hian thiamna hrang hrang nei Japanese mi 12-in hna an thawk a, buh leh thlai tharchhuah chauh ni lovin, a sawngbawl leh a hralhna tur kawng pawh duan tel a ni. Mr.S.Yamaoka report dan chuan kum 2035-ah buh kan mamawh za a sawmruk (60%) kan thar chhuah theihna tur Master Plan puahchah mek ani.
        'Master Plan' lo duan chhin chu en ho a niin, zau taka sawiho a ni a, Japanese mithiamte hna lo thawh tawh chin chu meeting chuan tha an tiin hmalak leh zel an tum dan pawh tha tih a ni. Hun reilote chhunga hna an thawh nasat hman zia chu 'entawntlak' a tih thu Chief Secretary chuan sawiin, tuna an hmalakna hi 'Mizoram hmasawnna hnuk a ni' a ti.
        He meetingah hian Mizorama department hrang hrang hotute bakah Ministry of Water Resources aiawh leh JICA (India) Office, Delhi atanga lokal Dr. Yu Sasaki, Lead Development Specialist te'n an telpui bawk.