FAQ

1. Irrigation & Water Resources Department hian enge in thawh ber?

Ans. Irrigation & Water Resources Department hian leilet/huan neitute tana thil pawimawh (infrastructure) hrang hrang, tuikawng (channel/pipe), tui dahkhawlna (reservoir/ water harvesting pond/tanky), leilet/huan panna kawng (approach road), leilet siam/cheh rem (land leveling & shaping), tui tam lutuk paih (drainage system), a zawrhna tur in (Bazar shed) sak leh a dahkhawlna (godown) te a tul dan ang zelin leilet neitute tan a siam thei.

2. Mimalin dilna a siam theih em?

Ans. Theih e. Amaherawh chu AIBP (Accelerated Irrigation Benefits Programme) guidelines-in a phut angin Minor Irrigation Project a lak theih ram (area) te ber hi Irrigation potential 10 ha tal a nih avangin a zau (area-wise) angin Project hi kalpui a ni fo thin.

2. Minor Irrigation Project siam hi duh ve ta i la engtia dil tur nge? form a awm em?

Ans. Dilna form a awm hran lo a, plain paper-ah ziak mai tur a ni e. A diltu address leh phone number chiang taka dah tur a ni a, sketch map leh beneficiary zat tur te, an ram neih zauzawngte leh a tui lak tur awm dante tarlan theih anih chuan a tha leh zual. District Headquarters(Mamit tih loh) tina Irrigation & Water Resources-ah te thehluh mai tur a ni a, tin, heta tarlan bak zawh tur nei chuan division/sub division office-ah te pawh zawh fiah theih a ni e. Hemi Website-a Who's Who tihah hian contact number pawh dah vek a ni.

3. Subsidy in pipe a lei theih em?

Ans. Irrigation & Water Resources Department-ah hian pipe emaw thildang emaw pawh, subsidy scheme a kalpui a ni ngai lo. Amaherawhchu Minor Irrigation Project chhunga mi, project-ina a kentel a nih chuan pipeline leh thildang engpawh, a thlawn (100% grant) a siam thin ni.

4. Project zawh tawh ho hi engtia enkawl (maintain) thin nge?

Ans. Minor Irrigation Project siamna reng rengah a tui hmang tangkaitute zawng zawng telna, Water Users Association din a ni thin a, he association hi operation leh maintenanace kalpui tura ngaih a ni. Chutih rualin thil hautak leh harsa chu department tanpuinain a tul ang anga hmalak thin a ni.

5. Water Users Association hian kalphung(guidlines) a nei em?

Ans. Water Users Association-ah hian MI Project atanga tui hmu zawng zawng te chu tel vek tur a ni. Chutih rualin project zau huamchhung ami pawh tui hmu lo an nih chuan Association Member an ni thei lovang. Tin, Office Bearers te hi Member kalkhawmin thlan tur a ni a, term khat hi kum hnih(2) zel tur a ni a, kum hih danah inthlanna buatsaih tur a ni.

6. Flood management Scheme hmang hian Irrigation & Water Resources Department hian eng hna nge in thawh?

Ans. Flood Management Scheme hnuaia Anti-Erosion Scheme atangin Leilette tuilian in a tihchhiat siam leh a chhe zel tur danna hna Irrigation & Water Resources Department hian a thawk.

7. Kan leilet awmna hi luite leh luilian deuh kam a ni deuh vek a, kum tin tuilian chuan leilet a hrutbal thin a, tuilianin buhhmunte a chim bawk thin a, chutiang chu a mal in siamsak/vensak thei tihna em ni?

Ans. FMP hnuai ah hian Guidelines fel tak a awma, Guideline thar ber Oct 2013 a tihchhuahah chuan Scheme pakhat man hi cheng nuaisangkhat(Rs 10 crore) aiin a lian tur a ni tih a ni a, chuvangin leilet chhia hi luidung tluan a siam a ngai a, chutah pawh chuan a tam mawh hle a, leilet awmna lui ¾ tepawh a rual a siam a ngai chuvangin mimal pakhat ram chhia chu a mal chauh a siamsak theih a nih loh hmel khawp mai.

8. A Scheme siamchhung a rei em?

Ans. DPR (Detail Project Report) siam hma hian uluk tak a survey a ngai a, survey-ah chuan lui dungtluan in Longitudinal section lak a ngai a, tuilian in a tihchhiatna hmun apiang ah Cross Section lak a ngai bawk a, Tuilianin a chim chin vaukamah bank line survey a ngai bawk a, chungte mai bakah-kum 10 chhung a tuilianin a chim chin leh a tihchhiat hriat a ngai bawk a, chuvangin DPR siam hun chhung a rei khawp mai.

9. DPR siam zawh chuan hna in thawk tan nghal mai em ni?.

Ans. Thawk tan nghal mai lo ve, DPR siam fel ve leh State Technical Advisory Committee in DPR an enfel a exam vek a ngai a, siam tlak a ni an tih chuan Director (Monitoring & Appraisal) CWC ah an theh thla ang a, Director (M&A) chuan Technical Clearence a pek theih chuan Planning Commission ah a thehlut ang a, Planning Commission in Investment Clearence a pe ang, chumi hnuah chuan Ministry of Water Resources, Government of India atang pawisa release dil chauh tur a ni. A tlangpuiin investment clearance atan hian thla ruk tal nghah a ngai.

10. Department hian thawh lai mek in nei em? In neih chuan, Loneituten an chhawr tangkai em?

Ans. Hnathawh laimek kan nei. Loneituten an chhawr mai bakah a hna hi open tender a thawktu thlan a ni a, Mipui tam tak tan nitin inhlawhna tha tak a siam a, loneitu aimahin mipui vantlang an lawm zawk emaw tih tur a ni. Thingtlang inhlawh fakna tur awm loh naah nitin inhlawhna a awm thei a, an tangkaipui hle.