Mizoram ei leh bara kan intodelhna tur kawng pawimawh tak, ‘Study on Development and management of Land and Water Resources for Sustainable Agriculture in Mizoram ’ chu thawh tan a ni ta. He development study hi Mizoram sawrkar leh Japan sawrkar inremna angin Japan sawrkarin a senso zawng zawng tuma an buatsaih tur a ni. He hna thawk tur hian JICA chuan Team of Experts rawn tirin tunah hian hna an thawk ngawrh tawh hle a ni. He development study hi thla 20 chhunga zawh tum a ni a, tin, hlawm hnih a then a ni. Hlawm khatna chu August 2014 hian zo tura ruahman a ni a, hlawm hnihna chu April 2015-ah zawh tum a ni. Hlawm khatna chhung hian Master Plan chu peih fel hman tum a ni a, he master plan siam tur hian data hrang hrang lakkhawm ngaite department hrang hrang 17 zetah kalin lakhawm mek a ni a, chung data lakkhawmte chu zir chiangin Mizoram hi zone hrang hrangah an then ang a, zone tina hmalak dan tur an duang dawn a ni. Tin, Minor Irrigation-in planning an siam dan leh DPR buatsaih dante an zir ang a, hmasawnna tur hrang hrang, department dangte nena tang kawp a kut hnathawktute tana chhenfakawm tak ni thei tura ruahmanna siam dan turte an duang bawk ang. Tin, tuna Minor Irrigation Project siam zawh tawhte pawh a dinhmun a zira siam that dan tur leh kut hnathawktute nena enkawl ho dan tur te ruahmanna an siam bawk ang. Hemi atana zawhna hrang hrang (questionaire) pawh buatsaihin, hman tlak a nih dawn leh dawn lohte pawh anmahni Team of Experts hovin dt.11/10/13 khan leilet neitute nen minor irrigation project pakhatah practical-a zirho a ni nghe nghe a, tunah hian project zawh tawh zawng zawng 390 dinhmun a hmuna enchiang tur leh information tul ang angte lak khawm turin Minor Irrigation Officer leh staff-te an thawk chhuak mek bawk.