MIZORAM TAN A ‘DEVELOPMENT STUDY’ TI TURIN JICA IN BUL AN TAN TA

         Hun engemawchen Minor Irrigation Department-in a lo buaipui ‘Study on Development and Management of Land and Water Resources for Sustainable Agriculture in Mizoram’ chu JICA ( Japan International Cooperation Agency) chuan October 2013 atang khan ngawrh takin a kalpui tan ta. JICA hi private company ni lovin Japan sorkarin ramdang sawrkar hnuaia hna thawk tur leh tanpui tura a din a ni.

        JICA hian 'Detailed Planning Survey Team' February, 2012 khan a rawn tir tawh a, Minor Irrigation Department leh Agriculture & Allied Department-te hnathawh a hmuna enin Aizawl, Serchhip, Kolasib, Mamit leh Champhai District huam chhung a hmun hrang hrang engemawzat an tlawh kual a. Mizoram sorkar hotute leh mi pawimawh dang engemawzat an kawm kual hnuah Minor Irrigation Department hnuaia thawkte nen Development Study hnuaia hmalakna in a huam leh ken tel tur chungchang sawiho a nih hnuah hmalak dan tur ruahmanna siam a ni.

         He Development Study hnuaia JICA hmalak dan tur leh ti hlawhtling tura Mizoram Sorkar leh JICA thawhho dan tur chungchang ruahmanna duan chu ni 24.2.2012 khan JICA official pali leh Minor Irrigation Department hotute nen en ho a nih hnuah Chief Minister Pu _ hovin pawm tlan a ni ta. He agreement hi Mizoram Sokar aiawhin Pu H.Darzika, Minor Irrigation Department Secretary leh JICA aiawhin Pu Sei Kondo, Representative, JICA India Office-ten an sign a ni. He meeting-ah hian Pu Van Hela Pachuau, Chief Secretary, leh Pu Lal Ramthanga, Principal Secretary-ten Chief Minister hi an tawiawm a ni.

Duan lawk chhin ang chuan Development Study hi thla sawmhnih (20) chhunga zo tur a ruahman a ni. He Project-in a tum bulpui berte chu :

  • Kuthnathawktuten dinchhuahpui tham buh leh thlai dang an tharchhuah ngei theihna tura kan leilung leh tui hman tangkai dan tur – Master Plan (long term Development Plan for Land and Water Resources) duan chhuah.
  • Mizoram hmun hrang hranga leilung pianken leh khawtlang kalphung leh mimal dinhmun hrang hrang mil tur a ruahmanna hrang Development Models engemawzat duan chhuah leh
  • DPR siam chungchangah department inlaichin hnai ho leh loneitute thawhho/tanho dan tur kawng kawhhmuhtu Integrated and Participatory Model duan chhuah-te an ni.

 ‘Study on Development and Management of Land and Water Resources for Sustainable Agriculture in Mizoram’  hi JICA Technical Cooperation Programme hnuaiah Development Study a ni a, hnathawhna (development works ) a keng tel lo. Senso ngai tur ang pawh avaiin JICA in an tum dawn a, Mizoram Sorkar lam atanga kan lo tum ve tur chu Minor Irrigation Department bakah kan sister departments-Agriculture, Horticulture etc hnuaia thawk te JICA Study Team tawiawm tur a lo depute/detail leh office (100 sq.m vel) lo pek a ni deuh mai.

                  He Development Study hi Minor Irrigation Department bakah Agriculture & Allied Department hnuaia thawkte tan intuaihriamna leh thiamna sang zawk thlen thei tur anih avangin he project hi kalpui hlawhtlin a nih hunah chuan Mizoram Loneitute hmasawnna atan rahbi pawimawhtak thlentu a nih a beiseiawm.